ძიუდოს საერთაშორისო ფედერაციამ ახალი რეიტინგი გამოაქვეყნა, რომელშიც წლევანდელი კონტინენტური პირველობებისა და ამ უქმეებზე ჩატარებული ბაქოს დიდი პრიზის შედეგებიცაა გათვალისწინებული. საქართველოს ნაკრების წევრთაგან, აქამდე ყველაზე მაღლა, 90 კილოგრამ წონით კატეგორიაში მოჭიდავე ვარლამ ლიპარტელიანი იდგა, ახლა კი მან მე-9 ადგილიდან ერთი საფეხურით უკან დაიხია. თურქულ ევროპირველობასა და აზერბაიჯანულ დიდ პრიზზე, ქართველთაგან ყველაზე მეტად ამირან პაპინაშვილმა (60 კგ) იყოჩაღა. ჯამში 238 (38+200) ქულა დააგროვა და 728 ქულით მე-8 ადგილზე დამკვიდრდა. მსუბუქ წონაში 47-ე ადგილიდან 34-მდე აიწია ევროპის ვერცხლის პრიზიორმა ბეთქილ შუკვანმა. მასსა და პაპინაშვილს შორის კი, 24-ე საფეხურზე დავით ასუმბანი დგას. 66 და 73 კილოგრამები ქართული გუნდის სუსტი წერტილია და სასიხარულო არც ბოლო ორ სარეიტინგო ტურნირზე მომხდარა. შალვა ქარდავა (66 კგ) მე-40 პოზიციაზე დგას, ხოლო ნუგზარ ტატალაშვილი – 36-ზე. უმნიშვნელოდ, მაგრამ წინ მაინც ორივემ წაიწია. სამაგიეროდ, 81 კილოგრამში მოჭიდავე ლევან წიკლაური 4 პოზიციით დაბლა დაეშვა და 25-ე საფეხურზეა. ევროპის ბრინჯაოს პრიზიორი ლევან ჟორჟოლიანი (100 კგ,) იმავე მე-13 ადგილზე დგას, ხოლო მძიმეწონოსანთაგან კი, ყველაზე წინ ადამ ოქრუაშვილია. ნაკრების დისკვალიფიკაციამისჯილი კანდიდატი 29-ეა და ზვიად ხანჯალიაშვილს მხოლოდ 2 ადგილით უსწრებს. საქართველოს ნაკრების ყველა კანდიდატის სარეიტინგო მაჩვენებელს და შვიდივე წონითი კატეგორიის საუკეთესო ხუთეულს აქვე გთავაზობთ.