ქართველი ჩოგბურთელი ანა ტატიშვილი, რომელსაც დღეს საღამოს, კარიერის ერთ-ერთ უმნიშვნელოვანესი მატჩი ელის, ქალთა საჩოგბურთო ასოციაციის (WTA) განახლებულ რეიტინგში ერთი საფეხურით დაწინაურდა და 648 ქულით 106-ე ადგილზე იმყოფება. შეგახსენებთ, რომ 21 წლის ტატიშვილი "როლან გაროს” ძირითად ბადეში გახლავთ დაშვებული და პირველივე რაუნდში ურთულესი გამოცდა ელის. ანას მეტოქე ფრანგი მარიონ ბარტოლი იქნება, რომელიც კლასიფიკაციაში მეთერთმეტეა და პარიზულ ტურნირშიც იდენტური განთესვით ჩაებმება. ტატიშვილისა და ბარტოლის მატჩი ფილიპ შატრიეს სახელობის ცენტრალურ კორტზე მე-4 ნომრადაა დანიშნული და შვეიცარიელი როჯერ ფედერერისა და ესპანელი ფელისინო ლოპესის შეხვედრის დასრულების შემდეგ, დაახლოებით, 18:30 საათამდე ვერ დაიწყება. ცხადია, საფრანგეთის ღია პირველობის გარდა, მიმდინარე კვირაში "წვრილ-წვრილი” ტურნირებიც იმართება. იტალიურ გრადოში, 25-ათასიან გათამაშებაში ჩაებმება მაკა ჩახნაშვილი, რომელიც ძირითადი ბადის საწყის რაუნდში ავსტრიელ ჯულია მაირს ეთამაშება. ტაილანდის დედაქალაქ ბანგკოკში იმყოფება ეკატერინე გორგოძე, სადაც ასევე 25-ათასიანი ტურნირი იმართება. ქართველი ჩოგბურთელი პირველ წრეში მე-3 ნომრად განთესილ ავსტრიელ მელანი კლაფნერს ეთამაშება. მექსიკის ქალაქ გვადალახარაში იასპარეზებს ვაჟთა შორის საქართველოს პირველი ჩოგანი ნიკოლოზ ბასილაშვილი. 10-ათასიანი ტურნირის საწყის შეხვედრაში, ბასილაშვილი მასპინძელ მიგელ გალარდო-ვალესს გაეჯიბრება. წყვილებში ქართველი და ზელანდიელი ტომპსონი ასევე მექსიკელებს (დიაზ-ბარიგა/რუიზ-როსალესი) ეთამაშებიან.