 25 წლის ლევან მეტრეველი ფილმის avatar- the last airbender (ავატარი - სტიქიის მბრძანებელი) მეორე სერიის სცენარისტი გახდა. პროექტში მისი სტატუსიდან გამომდინარე, ფიქრობს, რომ სამუშაოდ ამერიკაში გამგზავრებაც არ მოუწევს. ახალი ფილმის არც რეჟისორი და არც საპროდიუსერო კომპანია არ სახელდება. თუმცა არ არის გამორიცხული, ეს ფილმი რეჟისორმა ნაით შიამალანმა გადაიღოს. ლევან მეტრეველმა სწორედ ამ რეჟისორთან გაიარა სატელეფონო გასაუბრება, სანამ მას სცენარისტად დაამტკიცებდნენ. გარდა ამისა, შიამალანი ავატარი - სტიქიის მბრძანაბელის პირველი სერიის რეჟისორია. სანამ ლევან მეტრეველი ავატარი - სტიქიის მბრძანებლის რეჟისორთან მოხვდებოდა, მანამდე ამერიკის მწერალთა გილდიაში მოხვდა. ერთი წლის წინათ გილდიის ონლაინ კურსებზე შესარჩევი ეტაპი გაიარა. 5 საუკეთესოს შორის მოხვდა და ამერიკის მწერალთა გილდიის წევრიც გახდა. ამერიკის მწერალთა გილდია ახალგაზრდა სცენარისტებს პერიოდულად სხვადასხვა პროექტებში უწევს რეკომენდაციას. ლევან მეტრეველი ახლა ფილმის avatar- the last airbender (რომელიც შესაძლებელია სხვა სახელწოდებით გამოვიდეს) სასცენარო დეპარტამენტის მწერალია - ასეთია მისი პოზიციის ოფიციალური სახელწოდება, თუმცა, როგორც თვითონ ამბობს, უმცროსი სცენარისტია. ლევან მეტრეველს საქართველოში არც ერთ რეჟისორთან არ უთანამშრომლია. ამბობს, რომ ”აქაურ ამბებში” რთულად ერკვევა და რაც ამერიკელებისგან ისწავლა, აქ თითქმის გამოუსადეგარია. ”თუ ვნახავ, რომ რომელიმე რეჟისორმა დაიწყო თრილერების, ფენტეზის, ჰორორის გადაღება მაშინ სიამოვნებით ვითანამშრომლებ”,-ამბობს ლევან მეტრეველი.
მიმაგრება:  |
